Rom 10 | Ndebele | STEP | Bazalwane, isifiso senhliziyo yami, lomkhuleko kuNkulunkulu ngenxa kaIsrayeli yikuthi ba sindiswe .

Romans 10

1 Bazalwane, isifiso senhliziyo yami, lomkhuleko kuNkulunkulu ngenxa kaIsrayeli yikuthi basindiswe ^a. 2 Ngoba ngiyabafakazela ukuthi balokutshisekela uNkulunkulu ^b, kodwa kungenjengolwazi ^c; 3 ngoba bengakwazi ukulunga kukaNkulunkulu ^d, njalo bedinga ukumisa okwabo ukulunga, kabazehliselanga ngaphansi kokulunga kukaNkulunkulu ^e. 4 Ngoba uKristu uyisiphetho somlayo ekulungeni kuye wonke okholwayo ^f.

Ukulunga kukaNkulunkulu kungokwabo bonke abantu

5 Ngoba uMozisi ubhala ngokulunga okungokomlayo, ukuthi umuntu owenza lezizinto uzaphila ngazo ^g. 6 Kodwa ukulunga okungokholo kukhuluma kanje ^h: Ungatsho enhliziyweni yakho ukuthi: Ngubani ozakwenyukela ezulwini ⁱ? Lokhu kuyikuthi ukumehlisa uKristu; 7 kumbe ukuthi: Ngubani ozakwehlela ekujuleni? Lokhu kuyikuthi ukumkhuphula uKristu kwabafileyo ^j. 8 Kodwa kuthini? Ilizwi liseduze lawe, emlonyeni wakho lenhliziyweni yakho; leli yilizwi lokholo esilitshumayelayo ^k; 9 ukuthi uba uvuma ngomlomo wakho iNkosi uJesu ^l, njalo ukholwa enhliziyweni yakho ukuthi uNkulunkulu wamvusa kwabafileyo, uzasindiswa ^m; 10 ngoba ngenhliziyo omunye uyakholwa kube yikulunga, langomlomo uyavuma kube lusindiso. 11 Ngoba umbhalo uthi: Wonke okholwa kuye kayikuyangeka ⁿ. 12 Ngoba kakukho umehluko phakathi komJuda lomGriki ^o; ngoba yinye iNkosi yabo bonke ^p, inothele bonke abakhuleka kuyo ^q. 13 Ngoba wonke loba ngubani ^r ozabiza ibizo leNkosi uzasindiswa ^s.

14 Ngakho bazayibiza njani abangakholwanga kuyo? Futhi bazakholwa njani kuyo abangezwanga ngayo? Futhi bazakuzwa njani bengelamtshumayeli ^t? 15 Njalo bazatshumayela njani uba bengathunywanga ^u? Njengokulotshiweyo ukuthi: Zinhle kangakanani inyawo zabatshumayela ivangeli lokuthula, zabatshumayela ivangeli ngezinto ezinhle ^v! 16 Kodwa kabalilalelanga bonke ivangeli ^w. Ngoba uIsaya uthi: Nkosi, ngubani owakholwa ^x umbiko ^{▼▼ umbiko: kumbe, intshumayelo, Gr. ukusizwa.} wethu ^z? 17 Ngakho ukholo luvela ekuzweni ^aa, lokuzwa ngelizwi likaNkulunkulu ^ab. 18 Kodwa ngithi: Kabezwanga yini? Yebo sibili ^ac, ilizwi labo liphumele emhlabeni wonke, lamazwi abo emikhawulweni yomhlaba ^ad. 19 Kodwa ngithi: UIsrayeli kaqedisisanga yini? Kuqala uMozisi uthi: Mina ngizalivusela umona ngabo abangesiso isizwe ^ae, ngilithukuthelise ngesizwe esingelangqondo ^af. 20 LoIsaya ulesibindi uthi: Ngaficwa yilabo abangangidinganga, ngabonakala kubo abangabuzanga ngami ^ag. 21 Kodwa kuIsrayeli uthi: Usuku lonke ngelulela izandla zami kubantu abangalaleliyo labalenkani ^ah.